MANILA — Nagbabala si dating Senador Panfilo “Ping” Lacson na maaaring humarap sa kasong perjury ang surprise witness na si Orly Guteza kung mapatutunayang peke ang kanyang pirma at hindi siya personal na nagpakita sa notaryo para sa kanyang affidavit.

Ayon kay Lacson, malinaw na nakasaad sa batas na ang sinumang magbibigay ng maling impormasyon o magsusumite ng dokumentong hindi totoo ay maaaring papanagutin.

“If it is proven that he lied and that he did not face the notary public in the document, then he can be charged with perjury, which the committee can recommend in its report,” pahayag ng dating senador.

Lumabas ang babala matapos igiit ng abogadang si Petchie Rose Espera na peke ang kanyang lagda at walang pahintulot ang paggamit ng kanyang notarial details sa affidavit na inihain ni Guteza. Ayon kay Espera, hindi siya kailanman nakaharap ng nasabing testigo at hindi rin siya nagbigay ng otorisasyon para sa anumang notaryo na kaugnay sa dokumento.

Dahil dito, mas lalong lumakas ang panawagan na busisiin ang kredibilidad ng affidavit at ng testigo mismo. Ayon sa mga legal expert, kung mapapatunayang may anomalya sa dokumento, hindi lamang ito makakaapekto sa kasalukuyang imbestigasyon kundi maaari ring magsilbing basehan para sa pagsasampa ng kaso laban kay Guteza.

Samantala, patuloy na inaabangan ng publiko ang magiging hakbang ng komite kung irerekomenda nga ba ang kasong perjury laban sa witness na ito. (Larawan: Ping Lacson / Facebook)