LAGUNA — Sa halip na magdulot ng inspirasyon, naging sentro ng kontrobersiya ang mensahe at caption na ibinahagi ni Laguna Governor Sol Aragones para sa mga iskolar ng probinsya, matapos itong umani ng sari-saring reaksyon at batikos mula sa publiko sa social media.

Sa kanyang post kaugnay ng pamamahagi ng scholarship payout, sinabi ng gobernador:

“Hindi kayo dapat malungkot, dapat masaya kayo ngayon. Hindi ko kayo pinersonal, kahit pa sa dati kayong administrasyon. Hindi ko pinutol ang scholarship nyo dahil walang kinalaman ang Pulitika sa Pangarap nyong makapagtapos ng pag-aaral.”

Bagama’t layunin ng gobernador na idiin na hindi niya hinahayaang maapektuhan ng pulitika ang mga programang pang-edukasyon, maraming netizens ang nagsabing lumabas itong mayabang at may halong pangmamaliit. Para sa ilan, imbes na simpleng pagbati at positibong pahayag ang ibahagi, ang nabanggit na linya ay nagmistulang paalala na dapat magkaroon ng “utang na loob” ang mga iskolar sa kasalukuyang pamunuan.

Ilan sa mga komentaryo online ang nagsabing hindi na kailangang banggitin ang nakaraang administrasyon o igiit na hindi pinutol ang scholarship, dahil natural na tungkulin ng pamahalaan ang pagpapatuloy ng mga programang makatutulong sa kabataan. May netizens ding nagpunto na mas mainam sanang nakatuon ang mensahe sa pagpapalakas ng loob ng mga iskolar at sa pagbibigay-inspirasyon para ipagpatuloy ang kanilang pag-aaral.

Sa kabilang banda, may mga tagasuporta si Gov. Aragones na iginiit na mali lamang ang interpretasyon ng publiko sa kanyang sinabi. Ayon sa kanila, malinaw ang intensyon ng gobernador na ipahayag na walang kinalaman ang politika sa pagpapatuloy ng benepisyo para sa mga estudyante at na mananatiling prayoridad ng probinsya ang edukasyon.

Dahil sa mabilis na pagkalat ng isyu, naging mas malawak ang diskurso online tungkol sa ugnayan ng mga social programs at pamumulitika. Para sa ilang tagamasid, ipinapakita lamang nito kung gaano kasensitibo ang publiko sa mga pahayag ng mga halal na opisyal, lalo na kung may kinalaman sa kabataan at edukasyon.

Patuloy na naghahati ng opinyon ang publiko—kung ang mensahe ba ni Gov. Sol ay isang paalala ng suporta para sa mga iskolar, o isang halimbawa ng nakaugaliang “utang na loob politics” na matagal nang bahagi ng sistemang pampulitika sa bansa.

Larawan: Gov. Sol Aragones Facebook