Setyembre 29, 2025 – Itinanggi ni Navotas Rep. Toby Tiangco ang kumakalat sa social media na nagbigay umano siya ng komento laban kay Orly Guteza, kasabay ng panawagan sa publiko na maging mas mapanuri sa mga pinagmumulan ng balita at impormasyon online.

Ayon kay Tiangco, walang katotohanan ang mga post na ipinapakalat na ikinakabit ang kanyang pangalan sa usapin tungkol kay Guteza. Aniya, hindi niya personal na kilala ang naturang personalidad at wala siyang maibibigay na anumang pahayag hinggil dito.

“Fake news po at walang katotohanan ang kumakalat sa social media na may komento umano ako tungkol kay Orly Guteza. Hindi ko po siya kilala kaya wala akong maikokomento ukol sa kanya,” mariing pahayag ng kongresista.

Binigyang-diin ni Tiangco na patuloy na nagiging malaking hamon ang paglaganap ng maling impormasyon sa social media, lalo na’t maraming mamamayan ang umaasa rito bilang pangunahing mapagkukunan ng balita. Giit niya, nakasisira ito hindi lamang sa reputasyon ng mga indibidwal kundi pati na rin sa kredibilidad ng mga institusyon.

Dagdag pa niya, mahalagang magsagawa ng fact-checking at tiyaking mula sa lehitimong source ang anumang balita bago ito tanggapin o ibahagi. “Hinihikayat ko po ang publiko na maging responsable at huwag basta-basta maniniwala sa mga hindi beripikadong impormasyon na lumalabas sa internet,” ani Tiangco.

Si Tiangco, na nagsilbi nang alkalde ng Navotas bago maging kinatawan ng lungsod sa Kongreso, ay kilala sa pagiging tuwiran sa mga isyu at hindi pag-aatubiling sagutin ang mga maling paratang laban sa kanya.

Sa kabila ng mabilis na pagkalat ng naturang isyu sa social media, wala pang kumpirmasyon kung sino ang nasa likod ng pagpapakalat ng nasabing pekeng balita.

Patuloy namang nananawagan si Tiangco sa kanyang mga nasasakupan at sa publiko na manatiling mapagmatyag laban sa maling impormasyon na maaaring magdulot ng kalituhan at maling pananaw sa lipunan.

Larawan: Toby Tiangco Facebook page