ILOILO CITY — Inatasan ng Office of the Ombudsman ang agarang pagtanggal sa serbisyo nina Mayor Ma. Jofel Soldevilla at Vice Mayor Michael Omar Lacson ng bayan ng Zarraga, Iloilo dahil sa kasong grave misconduct kaugnay ng isang umano’y maanomalyang transaksyon sa lupa.

Batay sa 22-pahinang desisyon na may petsang Setyembre 12, 2025 at inaprubahan ni Deputy Ombudsman Jose Balmeo Jr. noong Setyembre 17, napatunayang may administrative liability ang dalawang opisyal sa pagbili ng ₱11.6 milyong lupa na pag-aari ng pamilya ni Lacson para sa Local Shelter Plan ng bayan noong 2023.

Bukod sa dismissal, ipinataw din sa kanila ang mga accessory penalties tulad ng:

• Kanselasyon ng civil service eligibility
• Pagkawala ng retirement benefits
• Perpetwal na diskwalipikasyon sa paghawak ng anumang posisyon sa gobyerno
• Pagbabawal sa pagkuha ng civil service examinations

Ayon sa Ombudsman, may sapat na ebidensiya na ginamit nina Soldevilla at Lacson ang kanilang posisyon upang isulong ang pansariling interes. Sa isang hiwalay na resolusyon, natukoy din ang probable cause para isampa ang kasong paglabag sa Republic Act 3019 o Anti-Graft and Corrupt Practices Act laban sa kanila.

Samantala, pitong iba pang opisyal ng lokal na pamahalaan ng Zarraga ang nasangkot sa kaso at pinatawan ng anim na buwang suspensiyon dahil sa simple misconduct. Kabilang dito sina Councilor Jose Jeffren Millan, accountant Era Lerdon, budget officer Glezil Lozañes, at treasurer Leonora Pauya.