OKTUBRE 24, 2025 — Binabantayan ngayon ng Department of Agriculture (DA) ang mga pamilihan matapos lumutang ang ulat na may ilang retailer ng imported na bigas ang nagbebenta ng lagpas sa itinakdang P43 kada kilo, sa kabila ng umiiral na import freeze.

Ayon sa DA, apat na show cause orders na ang naipadala sa mga tindahan sa Metro Manila na umano’y lumabag sa price ceiling. 

“If the complaints are validated, retailers will be issued show cause orders,” pahayag ni Agriculture Secretary Francisco Tiu Laurel Jr. 

(Kapag napatunayang totoo ang mga reklamo, padadalhan ng show cause order ang mga retailer.)

Sa datos ng DA-Bantay Presyo noong Oktubre 20, pumalo sa P50 hanggang P55 kada kilo ang presyo ng ilang premium imported rice sa Kamaynilaan — malinaw na paglabag sa maximum suggested retail price (MSRP) para sa 5% broken rice.

Bagama’t may pansamantalang tigil sa pag-aangkat ng bigas mula Setyembre 1, tiniyak ni Laurel na sapat pa rin ang supply. Aniya, may natirang 1.2 milyong metriko tonelada ng imported rice mula 2024, bukod pa sa 800,000 MT na dumating sa unang siyam na buwan ng 2025.

Layunin ng import freeze na itaas ang presyo ng palay sa gitna ng pagbagsak nito sa P8 kada kilo sa ilang lalawigan, dulot ng labis na supply at pinsala ng masamang panahon. Inaasahang palalawigin ni Pangulong Ferdinand Marcos Jr. ang suspensyon hanggang Disyembre.

Gayunman, iginiit ng DA na hindi dapat gamitin ng mga retailer na dahilan ang import freeze para magtaas ng presyo. 

“Hindi ito lisensya para samantalahin ang mga mamimili,” babala ni DA Assistant Secretary Arnel de Mesa. 

Patuloy ang inspeksyon ng Agribusiness and Marketing Assistance Service (AMAS) sa mga palengke at bodega upang tiyaking nasusunod ang price cap. 

Ayon kay AMAS Assistant Secretary Genevieve Velicaria-Guevarra, “We are intensifying our monitoring to protect consumers.” 

(Pinaiigting namin ang pagbabantay para maprotektahan ang mga mamimili.)

Sa gitna ng krisis sa presyo ng bigas, nananawagan ang DA ng kooperasyon mula sa mga retailer at publiko upang mapanatili ang abot-kayang presyo ng pangunahing pagkain ng mga Pilipino.

(Larawan: Philippine News Agency)