BONTOC, MOUNTAIN PROVINCE — Tatlong katao ang nasawi matapos bumagsak sa Chico River ang isang Elf truck na sangkot sa banggaan ng tatlong sasakyan sa Barangay Tocucan, Bontoc, Mountain Province, nitong Lunes ng umaga, Oktubre 27.

Ayon sa Bontoc Municipal Disaster Risk Reduction and Management Office (MDRRMO), naganap ang insidente bandang alas-6:00 ng umaga sa Sitio Gawa, Tocucan.

Ang Elf truck, na may sakay na limang manggagawa mula sa Balintaugan Construction, ay patungo sana sa isang proyekto sa Kuro-Kuro, Sadanga nang bumangga ito sa dalawang nakaparadang sasakyan — isang Ford Fiera at isang mini dump truck — sa isang kurbadang bahagi ng kalsada.

Dahil sa lakas ng banggaan, nahulog ang Elf truck sa malalim na bahagi ng Chico River. Kinumpirma ni Municipal Health Officer Dr. Diga Kay Gomez na tatlong bangkay ang agad na narekober at idineklarang dead on the spot.

Patuloy ang isinasagawang search, rescue, and retrieval operations ng MDRRMO, kasama ang mga lokal na pulis at volunteer responders, upang mahanap ang natitirang biktima. Ayon sa mga awtoridad, mahirap ang operasyon dahil sa lalim ng tubig at matinding agos sa lugar.

Ang insidente ay muling nagbigay-diin sa pangangailangan ng mas mahigpit na seguridad sa mga kalsadang matarik at palikong bahagi ng mga bulubunduking lalawigan.

Larawan mula Workforce at Ground Zero