MANILA — Kinumpirma ng Philippine Air Force (PAF) ang paglapag ng isang United States Air Force E-4B aircraft, kilala bilang “doomsday plane,” sa Ninoy Aquino International Airport (NAIA) nitong Linggo, Oktubre 26, para sa refueling at overnight crew rest.

Ayon sa pahayag ng PAF, ang naturang sasakyang panghimpapawid ay may diplomatic clearance at walang kaugnayan sa anumang VIP visit sa Pilipinas. “This aircraft has diplomatic clearance, but there is no VIP visit to the Philippines associated with it,” ayon sa PAF.

Ang E-4B, na tinatawag ding “Nightwatch,” ay isang militarisadong bersyon ng Boeing 747-200 at nagsisilbing airborne command post ng Pangulo ng Estados Unidos at ng kanyang defense chief sa panahon ng pambansang emerhensiya. May kakayahan itong manatili sa ere sa mahabang panahon at makaligtas sa nuclear attack, dahilan kung bakit tinagurian itong “doomsday plane.”

Ayon sa mga ulat, apat lamang ang ganitong uri ng sasakyan sa buong mundo, at bihira itong bumisita sa rehiyon nang walang kasamang mataas na opisyal ng gobyerno ng US.

Nanatili ang eroplano sa NAIA hanggang Lunes, Oktubre 27, habang binabantayan ng PAF ang operasyon bilang bahagi ng diplomatic layover.