MANILA — Upang mapigilan ang patuloy na pagpasok ng kontrabando sa mga kulungan, inihain ni Parañaque 2nd District Representative Brian Raymund Yamsuan ang House Bill No. 4797 o ang “Drone-Free Jails Act,” na naglalayong ipagbawal ang operasyon ng mga drone o unmanned aerial vehicles (UAVs) sa loob ng 100-meter radius mula sa mga pasilidad ng kulungan sa buong bansa.

Ayon kay Yamsuan, ang panukalang batas ay tugon sa tumitinding banta ng paggamit ng drone sa pagpapasok ng mga ilegal na bagay tulad ng droga, cellphones, armas, at iba pang kontrabando sa mga bilangguan. “While drones serve legitimate purposes in commerce and recreation and even in checking the progress of government infrastructure projects, they can also be misused and abused to commit crimes,” ani Yamsuan sa isang pahayag.

Bilang dating senior official ng Department of the Interior and Local Government (DILG), binigyang-diin ni Yamsuan ang kahalagahan ng seguridad sa mga pasilidad ng kulungan. “The passage of this bill will strengthen the security of our jail facilities and prevent the use of drones as tools for criminal activity,” dagdag pa niya.

Sa ilalim ng panukala, ang tanging mga eksepsiyon sa drone ban ay ang mga kaso ng emergency, kung saan maaaring mag-isyu ng permit ang Civil Aviation Authority of the Philippines (CAAP) sa koordinasyon at pahintulot ng jail authorities. Pinapayagan din ang paggamit ng drone para sa custodial security operations kung may kaukulang pahintulot.

Ang panukalang batas ay naglalaman ng mga probisyon para sa parusa sa mga lalabag, kabilang ang multa at posibleng pagkakakulong, depende sa bigat ng paglabag. Layunin nitong mapalakas ang proteksyon sa mga pasilidad ng kulungan at mapigilan ang mga makabagong paraan ng pagsuway sa batas.

Ayon sa mga ulat mula sa Bureau of Jail Management and Penology (BJMP), may mga naitalang insidente ng drone drops sa ilang kulungan sa Metro Manila at mga probinsya, kung saan ginamit ang UAVs upang maghatid ng kontrabando sa mga inmate.

Kasalukuyang nasa committee level ang panukala at inaasahang tatalakayin sa plenaryo sa mga susunod na linggo. Umaasa si Yamsuan na makakakuha ito ng suporta mula sa kapwa mambabatas upang maisabatas sa lalong madaling panahon.