OKTUBRE 29, 2025 — Ibinunyag ni Senate President Pro Tempore Panfilo Lacson ang umano’y pagtanggap ni dating Department of Public Works and Highways (DPWH) Secretary Manuel Bonoan ng mga sulat-kamay na “memo” mula sa mga sibilyan hinggil sa mga proyektong dapat isulong ng ahensya.

Ayon kay Lacson, ang mga memo ay isinulat sa Post-It notes at hindi dumaan sa opisyal na proseso ng DPWH. Sa halip, direktang tinanggap umano ito ni Bonoan mula sa mga indibidwal na walang kaugnayan sa ahensya.

“I am baffled by the documents I saw, where Bonoan received handwritten memos that turned out to be from civilians or non-organic DPWH personnel,” ani Lacson sa DZBB. 

(Hindi ko maintindihan ang mga dokumentong nakita ko, kung saan tumanggap si Bonoan ng mga sulat-kamay na memo mula sa mga sibilyan o hindi empleyado ng DPWH.)

“Such communications didn't go through the official channels of the department,” dagdag pa niya. “Why is the secretary dealing with them directly?” 

(Hindi dumaan sa opisyal na proseso ng ahensya ang mga komunikasyong ito. Bakit nakikipag-ugnayan ang kalihim sa kanila nang direkta?)

Hindi pinangalanan ni Lacson ang mga nagpadala ng memo, ngunit iginiit niyang hindi ito dapat pinakikialaman ng kalihim.

Bukod sa mga memo, binatikos din ng senador ang tinatawag na “leadership fund” ng DPWH, kung saan pinagsasama-sama umano ang mga hiling ng mga mambabatas para sa National Expenditure Program (NEP). Aniya, nagiging daan ito para manipulahin ang budget bago pa man ito aprubahan ng Kongreso.

“From the testimonies of DPWH personnel, it appears public funds have become nothing more but a toy for corrupt DPWH officials,” giit ni Lacson. 

(Batay sa mga salaysay ng mga tauhan ng DPWH, mistulang laruan na lang ng mga tiwaling opisyal ang pondo ng bayan.)

Binanggit din niya ang mga insidente ng arbitraryong pagpapalit ng proyekto — tulad ng P1.5 bilyong hiling para sa multipurpose buildings na ginawang P600 milyon para sa flood control — na aniya’y indikasyon ng prayoridad sa komisyon kaysa sa pangangailangan.

Sa darating na Nobyembre 14, nakatakdang magsagawa ng pagdinig ang Senate Blue Ribbon Committee, kung saan inaasahang magpapakita ang isang “napakahalagang testigo” na posibleng mag-ugnay pa ng ibang pangalan sa kontrobersya. Posibleng kabilang sa mga sangkot ang ilang opisyal ng gobyerno at mga pribadong indibidwal.

(Larawan: Ping Lacson)