NOBYEMBRE 13, 2025 — Humiling si Senador Ronald “Bato” Dela Rosa sa Korte Suprema na agarang ipatigil ang anumang pagpapatupad ng arrest warrant mula sa International Criminal Court (ICC), kung mayroon man.

Sa kanyang manifestation, iginiit ni Dela Rosa na dapat obligahin ang Department of Justice (DOJ) at Department of Foreign Affairs (DFA) na magsumite ng pormal na sertipikasyon kung totoong may inilabas na kautusan ang ICC laban sa kanya.

Ang hakbang ay kasunod ng pahayag ni Ombudsman Jesus Crispin Remulla na nagsabing may arrest order na inilabas ang ICC. Sa kabila nito, nilinaw ng DOJ, DFA at Department of the Interior and Local Government (DILG) na wala pang ganitong utos.

Binanggit ni Dela Rosa na hindi maaaring basta-basta isuko ng pamahalaan ang isang Pilipino sa ICC nang walang malinaw na proseso. 

Aniya, "The Statute envisions the participation of domestic courts, not their exclusion. Even among State Parties, compliance requires a written request, a copy of the warrant, and a judicial process to validate surrender." 

(Ang Statute ay nakikita ang partisipasyon ng mga lokal na hukuman, hindi ang kanilang pag-aalis. Kahit sa mga State Parties, kailangan ang nakasulat na kahilingan, kopya ng warrant, at proseso sa hukuman para beripikahin ang pagsuko.)

Dagdag pa niya, hindi dapat umasa ang Executive Branch sa Section 17 ng Republic Act No. 9851 bilang batayan para sa pagsuko ng mga mamamayan sa dayuhang hukuman. 

“The reliance on Section 17 would effectively convert a statutory provision into a blank check for the Executive Branch to surrender Filipino citizens to foreign bodies at will," giit niya.

(Ang pag-asa sa Section 17 ay gagawing parang blank check ang batas para isuko ng Executive Branch ang mga Pilipino sa mga banyagang hukuman nang basta-basta.)

Kasabay nito, muling binuhay ni Dela Rosa ang petisyon na isinampa niya kasama si dating Pangulong Rodrigo Duterte noong Marso 11, 2025 laban kay Executive Secretary Lucas Bersamin kaugnay ng pag-aresto at paglipat kay Duterte sa Netherlands.

Sa naturang petisyon, binigyang-diin ng kanyang abogado na si Israelito Torreon: “The petitioners therefore beseech this Honorable Court to assert its constitutional role as final arbiter of both judicial and constitutional propriety, and to prevent another constitutional breakdown that would erode the very notion of Philippine sovereignty.” 

(Ang mga petitioner ay taimtim na humihiling sa Kagalang-galang na Hukuman na ipakita ang konstitusyonal na papel nito bilang huling tagapamagitan ng hustisya at konstitusyonal na kaayusan, at pigilan ang panibagong pagbagsak ng Konstitusyon na sisira sa mismong konsepto ng soberanya ng Pilipinas.)

Nagbabala si Dela Rosa na may malinaw at patuloy na panganib na siya ay maaresto o maisuko sa banyagang hukuman nang walang due process. Dahil dito, naghain din siya ng mosyon upang pilitin si Ombudsman Remulla na ipakita sa Korte Suprema ang kopya ng sinasabing arrest warrant na aniya’y hawak nito sa kanyang telepono.

Ayon kay Torreon, “As a respondent, Remulla owes candor, full disclosure, and fidelity to this Honorable Court.” 

(Bilang respondent, tungkulin ni Remulla ang pagiging tapat, ganap na pagbubunyag, at katapatan sa Kagalang-galang na Hukuman.)

Sa ngayon, nakabinbin sa Korte Suprema ang desisyon kung kikilos ito upang pigilan ang anumang posibleng pagpapatupad ng ICC warrant laban kay Dela Rosa.

(Larawan: Senate of the Philippines| Facebook)