NOBYEMBRE 20, 2025 — Patuloy ang pag-usad ng imbestigasyon sa misteryosong pagkawala ng mga sabungero matapos muling makuha ng mga awtoridad ang 57 piraso ng buto mula sa ilalim ng Taal Lake ngayong Nobyembre.

Ayon kay Department of Justice (DOJ) spokesperson Atty. Polo Martinez, tatlong magkakahiwalay na operasyon ang isinagawa ng Criminal Investigation and Detection Group (CIDG)–Region IV-A. 

“On November 6, November 17, and November 18, the CIDG–Regional Field Unit of Region IV-A conducted separate investigations in Taal Lake. This followed the resumption of investigation and diving operations, which were previously suspended because of the typhoon and the condition of Taal Volcano in the area,” aniya. 

(Noong Nobyembre 6, Nobyembre 17, at Nobyembre 18, nagsagawa ng magkakahiwalay na imbestigasyon ang CIDG–Regional Field Unit ng Region IV-A sa Taal Lake. Ito ay kasunod ng muling pagbabalik ng imbestigasyon at diving operations na pansamantalang sinuspinde dahil sa bagyo at kondisyon ng Bulkang Taal sa lugar.)

Sa Nobyembre 6, nakolekta ang 25 piraso ng buto. Sa Nobyembre 17, anim na buto ang nakuha kasama ang mga gamit gaya ng itim na pantalon na may sinturon, puting salawal, at isang piraso ng telang harina. Dalawampu’t anim pang buto ang nadiskubre sa Nobyembre 18.

Simula pa noong Hulyo 10, nagsasagawa ng sunod-sunod na pagsisid ang Philippine Coast Guard sa lawa, kung saan ilang sako ng buto ang naiahon at ipinasa para sa pagsusuri. Sa kabuuan, 981 piraso ng buto na ang naipadala na sa forensic examination mula Hulyo hanggang Oktubre.

Mahigit 30 katao ang naiulat na nawawala mula 2021 hanggang 2022, kaugnay ng umano’y game-fixing sa online cockfighting o e-sabong. Naniniwala ang mga imbestigador na posibleng mas mataas pa ang aktwal na bilang.

Samantala, nananatiling nakabinbin ang desisyon ng DOJ sa reklamong isinampa laban sa gaming tycoon na si Atong Ang at iba pang kasamang respondent na iniuugnay sa pagkawala ng mga sabungero.

(Larawan: Department of Justice)