NOBYEMBRE 20, 2025 — Sa gitna ng mainit na talakayan sa Senado hinggil sa panukalang pambansang budget para sa 2026, iginiit ng Department of Budget and Management (DBM) na nakasentro ito sa sektor ng edukasyon. Ang kabuuang halaga ay umaabot sa ₱6.793 trilyon, na ayon sa ahensya ay malinaw na pruweba ng pagtutok ng administrasyong Marcos sa mga mag-aaral, guro, at komunidad ng paaralan sa buong bansa.

Sa 2025 DepEd Classroom Summit na ginanap sa SMX Clark, binigyang-diin ni DBM officer-in-charge Secretary Rolly Toledo ang pangako ng pamahalaan na magtayo ng ligtas, makatao, at matibay na mga silid-aralan na kayang humarap sa hamon ng kalamidad at pagbabago ng klima.

“For the first time, 4% of our GDP is dedicated to education — clear proof that this government, under the leadership of PBBM, is investing in our children, our teachers, and our schools,” ani Toledo. 

(Sa unang pagkakataon, 4% ng ating GDP ay nakalaan sa edukasyon — patunay na ang pamahalaang ito, sa pamumuno ni PBBM, ay tunay na nag-iinvest sa ating mga anak, mga guro, at mga paaralan.)

Mula sa kabuuang budget, ₱928.5 bilyon ang nakalaan para sa Department of Education. Sa halagang ito, ₱44.58 bilyon ang tiyak na gugugulin sa imprastruktura ng edukasyon. Target ng pondo ang pagtatayo ng halos 4,900 bagong silid-aralan, kabilang ang mga angkop para sa kindergarten, at pagkukumpuni ng mahigit 9,400 silid-aralan sa iba’t ibang rehiyon.

Kasama rin sa plano ang ₱1.134 bilyon para sa rehabilitasyon ng mahigit isang daang makasaysayang Gabaldon school buildings, upang mapanatili ang kanilang kasaysayan habang ginagawang ligtas at kapaki-pakinabang para sa kasalukuyang henerasyon ng mag-aaral.

Para naman sa mga malalayong komunidad, nakalaan ang ₱3 bilyon para sa pagtatayo ng 200 Last Mile Schools. Ang mga ito ay idinisenyo na may solar power, pasilidad sa tubig at sanitasyon, at kumpletong kasangkapan upang matiyak ang maayos na pagtuturo kahit sa pinakamalayong lugar.

Dagdag pa rito, nakapaloob sa budget ang pagbili ng kasangkapan para sa mahigit 18,000 silid-aralan, elektripikasyon ng higit 400 paaralan, at pagtatayo ng mahigit 300 pasilidad pangkalusugan at sanitasyon.

Bukod sa bagong konstruksiyon, nakalaan ang ₱9.39 bilyon para sa Infrastructure for Safer and Resilient Schools Project. Layunin nitong ayusin, i-retrofit, at muling itayo ang halos 1,300 paaralan na naapektuhan ng kalamidad.

Malinaw ang mensahe ng DBM: ang kinabukasan ng kabataan ang pangunahing puhunan ng pamahalaan.

(Larawan: Philippine News Agency)