Matagumpay na sumailalim sa kidney transplant ang dating NBA star na si Nate Robinson noong Biyernes at balak niyang panoorin ang Super Bowl sa ospital kasama ang kanyang donor. 

Si Robinson, isang tatlong beses na kampeon sa slam dunk at naglaro ng 11 season sa NBA, ay matagal nang nakikipaglaban sa sakit sa bato bago isinagawa ang operasyon sa University of Washington Medical Center. 

"Nagpapasalamat ako sa aking mga doktor, sa University of Washington, sa aking pamilya, sa aking donor, at sa kanyang pamilya," pahayag ni Robinson sa CNN sa pamamagitan ng kanyang ahente na si Polo Kerber. 

Kinumpirma ni Kerber na matagumpay ang operasyon at sinabing, “Mas maganda na ang kanyang pakiramdam at itsura. Nakalakad na siya sa ospital ngayong araw at balak niyang panoorin ang Super Bowl kasama ang kanyang donor.” 

Unang nalaman ni Robinson na kakailanganin niya ng kidney transplant noong nagsisimula pa lang siya sa NBA sa New York Knicks. Gayunpaman, itinago niya ang kanyang kondisyon sa publiko hanggang 2022, pitong taon matapos ang kanyang huling laro sa liga. 

“Para sa akin, nakagugulat malaman na balang araw ay titigil sa paggana ang aking mga bato,” ibinahagi ni Robinson sa isang Playmaker HQ documentary noong Nobyembre 2022. 

“Gusto ko lang talagang sulitin ang oras ko sa liga at maglaro hangga’t kaya ko. Sinubukan kong huwag isipin ito at magpokus sa laro, para mas ma-enjoy ko ang NBA career ko. Sinabi ko sa sarili ko, ‘Hindi ko hahayaang pigilan ako nito sa paglalaro at paggawa ng gusto ko.’” 

Mula 2021, regular nang sumasailalim si Robinson sa dialysis, isang paggamot upang alisin ang dumi at sobrang likido sa dugo kapag hindi na gumagana nang maayos ang mga bato.  

Noong nakaraang taon, ibinahagi ng 40-taong-gulang na atleta sa ESPN ang matagal na paghihintay niya para sa isang kidney transplant. 

“Balang araw, kapag nakakuha na ako ng kidney, babalikan ko ang lahat ng pinagdaanan ko at iisipin, ‘Grabe, dinaanan ko lahat ito,’” aniya. 

“Napakahalaga ng kidney na iyon sa akin. Iingatan ko ito, aalagaan na parang isang sanggol, at gagawin ang lahat ng kinakailangan upang mapanatili itong malusog.”

 Larawan: TODAY