Marso 25, 2025 — Iginiit ng Malacañang nitong Lunes na hindi dapat umiwas sa posibleng pag-aresto si Senador Ronald “Bato” de la Rosa sakaling maglabas ng warrant ang International Criminal Court (ICC) kaugnay ng mga umano’y krimen sa ilalim ng drug war ng administrasyong Duterte.

Ayon kay Presidential Communications Office (PCO) Undersecretary at Palace Press Officer Claire Castro, mismong si Dela Rosa na ang nagsabing valid ang ICC warrant of arrest laban kay dating Pangulong Rodrigo Duterte, na kasalukuyang nakakulong sa The Hague, Netherlands.

“Inamin na ni Senator Bato, ‘valid ang warrant of arrest,’ siya na ang nagsabi,” pahayag ni Castro sa isang press briefing. “Kung siya man po ay magtatago, hindi magandang maging modelo ang katulad ni Senator Bato na dati nang naging PNP chief.”

Sa mga naunang ulat, binanggit na parehong sina Dela Rosa at Oscar Albayalde, na kapwa nagsilbing hepe ng Philippine National Police (PNP) sa panahon ng Duterte administration, ay posibleng maisama sa mga susunod na warrant of arrest mula sa ICC.

Ayon kay Kristina Conti, assistant to counsel sa ICC, “from the very start,” tatlong pangalan na ang binigyang-diin sa mga dokumento ng ICC: sina Duterte, Dela Rosa, at Albayalde.

Si Senador Dela Rosa, na naging PNP chief mula Hulyo 2016 hanggang Abril 2018, ang pangunahing nagpapatupad ng anti-drug policy ni Duterte.

Nagbabala rin si Castro na kung pipiliin ni Dela Rosa na umiwas sa pag-aresto sa pamamagitan ng pananatili sa Senado—tulad ng ilang ulat sa mga nakaraang pahayag—magpapadala ito ng maling mensahe sa publiko.

“Hindi magiging magandang modelo iyan, dahil iyan po ay nang-ienganyo sa taong-bayan na kapag may warrant of arrest ay kailangang magtago na lamang,” dagdag niya.

Ang warrant laban kay Duterte ay inilabas ng ICC kaugnay ng mga kasong crimes against humanity na may kaugnayan sa madugong kampanya kontra droga. Si Duterte ay nasa ilalim ngayon ng kustodiya ng Interpol habang naghihintay ng paglilitis.

Binigyang-diin ni Castro ang kahalagahan ng paggalang ng mga opisyal ng gobyerno sa mga internasyonal na legal na proseso, lalo na’t si Dela Rosa na rin ang umamin sa bisa ng warrant.