AGOSTO 5, 2025 — Magsasagawa ang United States ng pilot program na magpapataw ng bond na hanggang $15,000 (mga ₱840,000) sa mga aplikante ng tourist at business visa simula Agosto 20. Layunin nitong bawasan ang mga dayuhang lumalabag sa kondisyon ng kanilang visa, ayon sa pahayag ng US government.

Magkakaroon ng kapangyarihan ang mga consular officer na mag-require ng bond sa mga manggagaling sa bansang may mataas na overstay rate o kulang sa screening data. Tatlong halaga ang posibleng ipataw: $5,000, $10,000, o $15,000 — na isasauli kung susundin ng turista ang tamang panahon ng pag-alis na nakasaad sa visa.

Bahagi ito ng mas malawak na immigration policy sa ilalim ni Pangulong Donald Trump, na naglalayong higpitan ang pagpasok ng mga turista at negosyante. Noong 2020, sinubukan na ang katulad na programa, pero naantala dahil sa COVID-19 pandemic.

Ayon sa State Department, isasaalang-alang ang overstay rates, kakulangan sa background check, at foreign policy concerns sa pagpili ng mga target na bansa. Kabilang sa may mataas na overstay rate ang Chad, Eritrea, Haiti, Myanmar, at Yemen, base sa datos noong 2023.

Tinatayang aabot sa 2,000 visa applicants ang maaapektuhan, ayon sa US Travel Association. Dagdag pa rito, magkakaroon ng bagong $250 "visa integrity fee" simula Oktubre 1 para sa non-immigrant visa, na maaaring mabawi kung susundin ang mga regulasyon.

"If implemented, the US will have one of, if not the highest, visitor visa fees in the world," komento ng isang grupo.

(Kapag naipatupad, magiging isa sa pinakamahal, kung hindi man pinakamahal, ang visa fee ng US sa buong mundo.)

Ang pilot program ay tatagal ng isang taon, at posibleng i-update ang listahan ng mga bansang saklaw nito.

(Larawan: U.S. Embassy in Mongolia)