AGOSTO 24, 2025 — Mabilis, tahimik, at walang panghuhusga — iyan ang pangakong dala ng bagong HIV self-test kit na inilunsad sa bansa. Sa gitna ng patuloy na pagtaas ng kaso ng HIV, lalo na sa kabataang Pilipino, inilunsad ng KonsultaMD, Faberco Life Sciences, at Southstar Drug ang isang makabagong solusyon: isang blood-based HIV self-test kit na pwedeng gamitin sa bahay.

Ayon sa Kalihim ng Kalusugan na si Teodoro Herbosa, “There was a 500% increase in HIV cases among Filipinos aged 15 to 25. In fact, the youngest we diagnosed was a 12-year-old child from Palawan.” 

(Nagkaroon ng 500% pagtaas sa mga kaso ng HIV sa mga Pilipinong nasa edad 15 hanggang 25. Sa katunayan, ang pinakabatang na-diagnose namin ay isang 12-anyos na bata mula sa Palawan.)

Dahil dito, humiling ang Department of Health ng deklarasyon ng public health emergency noong Hunyo.

Ang bagong test kit ay gawa ng Viatris at may 99.6% accuracy sa pagtukoy kung positibo o negatibo ang isang sample. Sa loob lamang ng 15 minuto, malalaman na ang resulta. Hindi na kailangang pumunta sa ospital o klinika — isang malaking hakbang para sa mga takot ma-stigmatize.

“[HIV] is a real and growing crisis, and we believe that healthcare must meet people where they are, with empathy, with dignity, and with urgency,” pahayag ni Rina Tadiar ng Metro Pacific Health Tech. 

(Ang HIV ay isang tunay at lumalalang krisis, at naniniwala kami na ang serbisyong pangkalusugan ay dapat lumapit sa mga tao kung nasaan sila — may malasakit, may dignidad, at may agarang pagkilos.)

Bilang unang telehealth app sa bansa na nag-aalok ng HIV services, layunin ng KonsultaMD na gawing mas madali ang pag-access sa tulong medikal.

Sa kasalukuyan, tinatayang nasa 252,000 Pilipino ang may HIV. Araw-araw, may 57 bagong kaso, at halos isang-katlo sa mga ito ay mula sa edad 15 hanggang 24. 

Para kay Thaddeus Sanchez ng Southstar Drug, ang solusyon ay dapat simple at hindi nakakahiya: “When someone orders a test kit through KonsultaMD, we ensure it reaches them quickly and confidentially.”

(Kapag may umorder ng test kit sa pamamagitan ng KonsultaMD, sinisiguro naming ito’y makarating agad at nang may lubos na pag-iingat sa pribadong paraan.)

Kapag nakuha na ang resulta, puwedeng agad kumonsulta sa doktor sa pamamagitan ng KonsultaMD app. May pre- at post-test counseling na bahagi ng proseso, alinsunod sa patakaran ng DOH. Ang buong serbisyo ay idinisenyo para sa mga gustong magpa-test nang hindi lumalabas ng bahay.

Bukod sa HIV, aktibo rin ang Faberco sa pagbibigay ng bakuna para sa mga bata at gamot para sa tuberculosis. 

Ayon kay Ching Santos, COO ng Faberco Life Sciences, “We’ve asked ourselves: Why do HIV cases continue to increase? A major reason is lack of education.” 

(Tinanong namin ang aming sarili: Bakit patuloy na tumataas ang mga kaso ng HIV? Isa sa pangunahing dahilan ay kakulangan sa kaalaman.)

Dagdag pa niya, “Many people do not truly understand the seriousness of the situation. Often, patients are only diagnosed when they are hospitalized or they begin showing symptoms. But why should we wait for it to get to that point?”

(Maraming tao ang hindi lubos na nauunawaan ang bigat ng sitwasyon. Kadalasan, nalalaman lamang na may HIV ang pasyente kapag naospital na sila o nagsimula nang lumabas ang mga sintomas. Pero bakit kailangang hintayin pang umabot sa ganung punto?)

Ang test kit ay mabibili sa KonsultaMD app. I-download ang app, magrehistro, at hanapin ang “HIV self-testing kit” sa Pharmacy section. Pwede itong ipa-deliver ng direkta sa bahay, nang hindi na kailangang makipagsalamuha sa iba.

Sa tulong ng teknolohiya, layunin ng mga katuwang na kompanya na mapalawak ang kaalaman, mapabilis ang diagnosis, at mapalapit ang gamutan sa mga Pilipino. 

Sa panahon ngayon, hindi na hadlang ang hiya o takot. Ang bagong test kit ay hakbang patungo sa mas ligtas, mas maalam, at mas maagang aksyon laban sa HIV.

(Larawan: Aidsmap)