Nilinaw ni Senator Bong Go na wala siyang kinalaman sa anumang negosyo ng kanyang pamilya matapos lumabas ang ulat na nagkaroon ng dating partnership ang CLTG Builders, isang kompanyang pag-aari ng kanyang ama, at ang kontraktor ng Department of Public Works and Highways (DPWH) na si Discayas.

Sa gitna ng imbestigasyon sa Senado kaugnay ng mga umano’y “ghost projects” at iregularidad sa pagpapatupad ng mga kontrata, binanggit ang pangalan ng CLTG Builders at ang ugnayan nito kay Discayas. Dahil dito, pinayuhan si Go na magpaliwanag upang maiwasan ang spekulasyon na maaaring siya ay nakinabang o nagkaroon ng impluwensiya sa mga transaksyon.

Mariing itinanggi ng senador ang anumang koneksyon, at iginiit na matagal na niyang pinaghiwalay ang kanyang tungkulin bilang lingkod-bayan at ang negosyo ng kanyang pamilya.

 “Kahit kasama ang kamag-anak ko, wala akong pinapaboran, wala akong dinadahilan. Ang tungkulin ko ay maglingkod sa taumbayan, hindi sa negosyo ng pamilya ko,” pahayag ni Go.

Dagdag pa niya, bukas siya sa anumang imbestigasyon upang malinawan ang lahat. “Handa akong harapin ang anumang imbestigasyon. Walang itinatago at wala akong pinoprotektahan,” aniya.

Samantala, nananatili pa ring nakatutok ang Senado sa pagbubunyag ng mga pangalan ng kontraktor at opisyal na umano’y sangkot sa mga kuwestyonableng proyekto. Patuloy ding tinututukan ng publiko ang pagdinig dahil sa lawak ng pondong nakapaloob sa mga kontratang hawak ng DPWH.