SETYEMBRE 5, 2025 — Sinampahan ng kasong katiwalian ng National Bureau of Investigation (NBI) si dating Bamban mayor Alice Guo at 35 pang dati at kasalukuyang opisyal ng lokal na pamahalaan kaugnay sa umano’y ilegal na conversion ng lupa para sa Philippine offshore gaming operator (POGO) sa Tarlac.

Ayon sa NBI, P10,000 lang ang binayarang buwis sa lupa na tinatayang nagkakahalaga ng P3.9 bilyon. Kasama sa mga isinampang reklamo sa Office of the Ombudsman ang graft, pag-aari ng interes na bawal sa isang opisyal, gross misconduct, serious dishonesty, at conduct prejudicial to the best interest of the service.

“Ang binayaran lang na buwis ay P10,000 para sa lupaing P3.9 billion ang halaga,” pahayag ni dating NBI Director Jaime Santiago.

Si Guo, na kinikilala rin bilang Guo Hua Ping, ay nakakulong sa Pasig City Jail. Nahaharap din siya sa mga kasong money laundering at qualified human trafficking na isinampa ng Criminal Investigation and Detection Group at Presidential Anti-Organized Crime Commission kaugnay sa operasyon ng POGO sa Bamban.

(Larawan: Philippine News Agency)