SETYEMBRE 14, 2025 — Nag-anunsyo ang grupong Pagkakaisa ng mga Samahan ng Tsuper at Operator Nationwide (PISTON) ng malawakang tigil-pasada sa Huwebes, Setyembre 18, bilang pagtutol sa umano’y sistematikong pagnanakaw ng buwis mula sa mga tsuper ng jeep.

Ayon sa PISTON, umaabot sa halos ₱12,000 kada buwan ang binabayarang VAT at excise tax ng bawat drayber para sa krudo. Ngunit imbes na mapunta sa modernisasyon ng pampublikong transportasyon, iginiit ng grupo na napupunta umano ito sa luho ng ilang opisyal at contractor.

“TAMA NA! SOBRA NA! SINGILAN NA!” sigaw ng PISTON. 

Giit ng grupo, hindi makatarungan na ang perang pinaghirapan sa kalsada ay nauuwi sa pagbili ng mamahaling sasakyan ng mga tiwaling nasa gobyerno. Anila, ang pondo ay dapat inilaan sa pagsasaayos ng mga lumang jeep at pagpapabuti ng serbisyo sa mga pasahero.

Dagdag pa ng PISTON, makikiisa rin sila sa mas malaking kilos-protesta sa Luneta sa Setyembre 21, kasabay ng paggunita sa anibersaryo ng deklarasyon ng batas militar. Layunin nilang ipanawagan ang hustisya para sa mga tsuper na anila’y matagal nang nilulubog sa utang at taas-presyo ng langis.

“Perang pinagpaguran natin sa pamamasada ay kinukurakot lang pala ng mga buwaya sa gobyerno at mga kasabwat nilang contractor,” giit ng grupo.

Nanawagan ang grupo sa publiko na makiisa sa kanilang panawagan para sa makatarungan at transparent na paggamit ng buwis. Ayon sa kanila, hindi lang ito laban ng mga tsuper kundi laban ng lahat ng Pilipinong umaasa sa maayos na transportasyon.

Ang tigil-pasada ay inaasahang mararamdaman sa iba’t ibang ruta sa buong bansa, na posibleng magdulot ng abala sa mga commuter. 

(Larawan: Piston: Pagkakaisa ng mga Samahan ng Tsuper at Operator Nationwide | Facebook)