MANILA — Sa loob lamang ng isang oras, inaprubahan ng House Committee on Appropriations ang ₱903-milyong panukalang budget ng Office of the Vice President (OVP) para sa taong 2026, sa ilalim ng prinsipyo ng inter-parliamentary courtesy. Dumalo sa pagdinig si Vice President Sara Duterte, na humarap sa mga tanong ng ilang miyembro ng minority bloc.

Bago pa man makapagtanong ang mga mambabatas mula sa Makabayan bloc, tinanong ni House appropriations vice chair Jose Alvarez si Duterte kung handa siyang i-waive ang inter-parliamentary courtesy. Pumayag ang Bise Presidente, kaya’t nagpatuloy ang pagdinig sa ilalim ng regular na deliberasyon.

Isa sa mga pangunahing isyu na binanggit ni ACT Teachers Rep. Antonio Tinio ay ang notice of disallowance mula sa Commission on Audit (COA) kaugnay ng ₱73 milyong confidential funds ng OVP noong 2023. Tugon ni Duterte: “You should ask COA. We have already complied with the documents they were asking for”.

Tinukoy din ni Tinio ang mga kontrobersyal na pangalan sa mga resibo ng confidential funds, ngunit tumanggi si Duterte na sagutin ito. “I will not discuss my defense team’s strategy,” ani Duterte, kaugnay ng impeachment proceedings kung saan ilang miyembro ng Kamara ang posibleng magsilbing taga-usig.

Samantala, tinanong ni Kabataan Rep. Renee Co ang Bise Presidente tungkol sa kanyang mga biyahe. Ayon kay Duterte, siya mismo ang gumastos para sa kanyang mga foreign trips, habang ang OVP ay sumagot lamang sa gastos ng kanyang security personnel at close aides.

Ang mabilis na pag-apruba ng budget ay kabaligtaran ng mas mahigpit na deliberasyon noong nakaraang taon, kung saan matinding tinutukan ang paggamit ng confidential funds ng OVP. Naantala pa ang orihinal na pagdinig noong Setyembre 12 dahil walang undersecretary-level official na dumalo sa sesyon.

Sa kabila ng mga kontrobersiya, tuloy ang pag-apruba ng budget ng OVP, na ngayon ay isusumite na sa plenaryo para sa mas malawak na deliberasyon.