SETYEMBRE 16, 2025 — Sa gitna ng lumalalim na usapin sa Kamara, naging sentro ng atensyon si Rep. Francisco “Kiko” Barzaga matapos ibunyag ni Rep. Janette Garin ang umano’y hindi angkop na asal nito habang nasa plenaryo. Sa panayam sa DZMM Teleradyo ngayong Setyembre 16, diretsahang sinabi ni Garin na pinagsabihan si Barzaga dahil sa paulit-ulit nitong pag-“meow” habang umiikot sa Kongreso.

“Pinagsabihan siya na ‘wag kang meow nang meow habang umiikot ka sa plenaryo,’” pahayag ni Garin. 

Ayon kay Garin, hindi ito simpleng biro kundi bahagi ng pattern ng pag-uugali ni Barzaga na umano’y nakaaapekto sa dignidad ng institusyon. Dagdag pa niya, may mga insidente rin kung saan tila ginagawang entablado ang Kongreso para sa personal na pagpapasikat.

Kinumpirma ng komite na may pormal nang reklamo laban kay Barzaga kaugnay ng kanyang asal. Bagama’t hindi pa isinasapubliko ang buong nilalaman ng reklamo, sinabi ng mga miyembro ng komite na seryoso ang mga alegasyon at kailangang imbestigahan.

Iginiit ng mga kaalyado ni Garin na hindi personal ang isyu kundi tungkol sa pagrespeto sa institusyon. 

“Hindi ito tungkol sa pulitika. Ito ay tungkol sa tamang asal sa loob ng Kongreso,” giit ng isang miyembro ng NUP.

Sa kabila ng mga pahayag, patuloy ang pagkalat ng mga video sa TikTok na nagpapakita ng mga di-pangkaraniwang kilos ni Barzaga sa loob ng Kongreso, kabilang ang isang video na tila nagpapakita ng kanyang “meow” moments.

Habang hinihintay ang pormal na aksyon ng House Ethics Committee, nananatiling mainit ang usapin sa publiko. 

(Larawan: Congressman Kiko Barzaga | Facebook)