QUEZON CITY — Inanunsyo ng University of the Philippines (UP) Diliman na lilipat sa remote at asynchronous modes of learning ang lahat ng klase mula Setyembre 17 hanggang 19, 2025, bilang tugon sa mga nakatakdang aktibidad na maaaring makaapekto sa transportasyon at access sa campus.

Sa opisyal na bulletin na inilabas ng UP Diliman Office of the Chancellor (UPD Bulletin 2025-009), pinayuhan ang mga guro na isagawa ang mga klase sa online o asynchronous na paraan upang matiyak ang tuloy-tuloy na pagkatuto sa gitna ng limitadong physical access sa campus. “Faculty members whose class activities may be done online are requested to consider shifting to remote and/or asynchronous modes of learning,” ayon sa memorandum.

Kasabay nito, pinahintulutan din ang mga opisina sa unibersidad na magpatupad ng work-from-home arrangements para sa mga empleyado, maliban sa mga yunit na may essential functions. Kabilang sa mga mananatiling on-site ang:

• University Health Service
• UP Diliman Police
• Campus Maintenance Office
• UP Diliman Fire Brigade
• Security Service Brigade
• Transportation Management Office

Ang hakbang ay bahagi ng proactive na pagplano ng pamunuan upang maiwasan ang abala sa operasyon ng unibersidad at mapanatili ang kaligtasan ng komunidad ng UP Diliman.

Pinayuhan ang mga estudyante, guro, at kawani na patuloy na mag-monitor sa opisyal na social media accounts ng UP Diliman para sa karagdagang abiso at updates.