MANILA — Lumalakas ang panawagan para panagutin sina Pangulong Ferdinand Marcos Jr. at Pangalawang Pangulo Sara Duterte matapos mabunyag na nakatanggap sila ng milyon-milyong pisong donasyon mula sa mga kontratistang nakikinabang sa malalaking proyekto ng pamahalaan.

Batay sa datos mula sa Commission on Elections (Comelec), ilang malalaking personalidad sa konstruksyon ang naging donor ng dalawang pinakamataas na opisyal ng bansa noong 2022 campaign. Naitala sa Statement of Campaign Contributions na si Rodulfo D. Hilot Jr., may-ari ng Rudhil Construction & Enterprises Inc., ay nagbigay ng ₱20 milyon kay Marcos Jr. Isa pang kontratista, si Jonathan M. Quirante ng Cebu-based Quirante Construction Corporation, ay nagbigay ng ₱1 milyon.

Pagkatapos ng halalan, kapansin-pansin ang mabilis na paglobo ng mga kontratang nakukuha ng kanilang mga kumpanya. Umakyat sa ₱3.5 bilyon ang kontrata ng Rudhil Construction noong 2024, habang pumalo sa ₱3.8 bilyon ang Quirante Construction sa unang walong buwan pa lang ng 2025.

Si Duterte naman ay nakatanggap ng halos ₱20 milyon na halaga ng campaign ads mula sa Esdevco Realty Corporation, kompanyang pagmamay-ari ni Davaoeño businessman Glenn Escandor. Kanyang construction firm, Genesis88, ay nakakuha ng halos ₱3 bilyon na flood-control contracts sa Davao Region mula 2022 hanggang 2025.

Ayon sa Omnibus Election Code, ipinagbabawal ang pagtanggap ng donasyon mula sa mga kontratistang may kasunduan sa pamahalaan, ngunit nananatiling tanong kung maipapatupad ang probisyong ito laban sa pinakamataas na lider ng bansa.

Gayundin ang iba pang senador, nakatanggap din ng mga donasyon mula sa iba't ibang kontratista ng proyekto sa pamahalaan.

Sa nakalipas na dalawang linggo, lumutang ang ebidensiya ng sabwatan sa pagitan ng mga kontratista, opisyal ng Department of Public Works and Highways (DPWH), at ilang mambabatas kaugnay ng flood-control projects. Naging bunga nito ang pagbibitiw ni dating Senate President Francis Escudero at House Speaker Martin Romualdez, matapos mabunyag na tumanggap din sila ng donasyon mula sa mga kontratista.

Sinabi ni Comelec Chairman George Garcia na muling pinaigting ng komisyon ang imbestigasyon sa campaign donors matapos aminin ni Escudero na nakatanggap siya ng kontribusyon mula sa isang government contractor. Higit 50 kontratista at ilang kandidatong tumakbo noong 2022 ang iniimbestigahan ngayon ng poll body.

Samantala, itinatag ni Pangulong Marcos ang Independent Commission for Infrastructure noong Setyembre 11 upang siyasatin ang mga anomalya. Hindi pa malinaw kung isasama sa saklaw ng imbestigasyon ang mga pangalan ng Pangulo at ng Pangalawang Pangulo.

(Larawan: PCIJ)