MANILA — Inanunsyo ni Pangulong Ferdinand Marcos Jr. ang pagbabalik ng ₱60 bilyon sa Philippine Health Insurance Corporation (PhilHealth), matapos itong ilipat sa National Treasury noong nakaraang taon. Ang hakbang ay bahagi ng layunin ng administrasyon na palawakin ang saklaw ng serbisyong pangkalusugan sa ilalim ng Universal Health Care program.

Ginawa ni Marcos ang pahayag sa kanyang pagbisita sa Dr. Jose Fabella Memorial Hospital sa Maynila noong Setyembre 20, kung saan sinuri niya ang implementasyon ng Zero Balance Billing policy. “’Yung PHP60 billion na iyan ibabalik na natin sa PhilHealth. Hindi lamang para sa pangamba ng tao kung hindi dahil gagamitin na natin ‘yan para palawakin pa ang services ng PhilHealth,” ani Marcos.

Ang pondong ito ay bahagi ng excess funds ng PhilHealth na dating ginamit para sa iba’t ibang proyekto ng gobyerno, kabilang ang mga pasilidad ng Department of Health (DOH) at mga social health programs. Ayon sa Department of Finance, ang pondo ay hindi galing sa kontribusyon ng mga miyembro, kundi mula sa hindi nagamit na government subsidies.

Noong Oktubre 2024, naglabas ng temporary restraining order ang Korte Suprema upang pigilan ang karagdagang paglipat ng pondo mula PhilHealth patungong Treasury, kasunod ng mga petisyon mula sa Philippine Medical Association at ilang mambabatas. Sa panahong iyon, ₱60 bilyon na ang nailipat, habang ₱29.9 bilyon na lang ang natitira sa PhilHealth.

Sinabi ni Finance Secretary Ralph Recto na ang pagbabalik ng pondo ay “legal, moral, and economically sound,” at layong palakasin ang access ng publiko sa serbisyong medikal. “Not a single centavo from its members’ contributions was touched,” giit ni Recto.

Inaasahang gagamitin ang ibinalik na pondo upang palawakin ang benepisyo ng PhilHealth, kabilang ang walang bayad na serbisyo sa pampublikong ospital, mas maraming saklaw ng outpatient care, at mas malawak na access sa gamot at treatment para sa mga mahihirap.