SABTANG, BATANES — Nagsimula nang magpatupad ng iba’t ibang paghahanda ang mga residente ng Barangay Nakanmuan, Sabtang, Batanes, matapos na italaga ng DOST-PAGASA si Nando bilang isang super typhoon na maaaring tumama o dumaan sa Batanes at Babuyan Islands sa Lunes ng hapon o gabi, September 22.

Kabilang sa mga natukoy na hakbang ang pagtali at pagpapatibay ng kanilang mga tradisyonal na bahay na bato, na matagal nang nagsisilbing matibay na kanlungan laban sa malalakas na bagyo sa probinsya. Sa mga larawang ibinahagi ng Batanes Police Provincial Office sa Facebook, makikitang sama-samang nagtutulungan ang mga residente upang tiyakin ang kaligtasan ng kanilang mga tahanan at pamilya.

Nagpahayag naman ang DOST-PAGASA na ang lakas at direksiyon ni Nando ay maaring magdulot ng matinding pagbaha, storm surge, at pagbagsak ng malalakas na hangin sa nasabing mga isla. Dahil dito, pinaigting din ng lokal na pamahalaan at mga otoridad ang kanilang panawagan para sa maagap na paghahanda, kabilang ang pag-iimbak ng pagkain, malinis na tubig, at mga pangunahing pangangailangan.

Samantala, patuloy na nakikipag-ugnayan ang mga opisyal ng barangay at bayan sa probinsya upang tiyakin ang maayos na koordinasyon para sa posibleng preemptive evacuation kung kinakailangan.

Inaasahang magdadala ng malalakas na ulan at matinding hampas ng hangin si Nando sa mga susunod na araw, kaya’t muling hinimok ng mga otoridad ang publiko na manatiling mapagmatyag at sumunod sa lahat ng babala at anunsiyo ng awtoridad upang maiwasan ang pinsala at trahedya.

????: Batanes Police Provincial Office / Facebook