MANILA — Muling nagpasabog ng matinding kritisismo si Boss Dada, isang kilalang political vlogger, matapos ang sunod-sunod na kalamidad na tumama sa bansa. Sa kanyang pahayag noong Oktubre 1, 2025, iginiit niyang sa bawat sakuna ay muling lumalabas ang aniya’y “ugat ng katiwalian” sa pamahalaan.

“Natural calamity exposes corruption in the government! Gumagalaw po ang langit. Mag-resign ka na bago pa mahuli ang lahat!” mariing pahayag ng vlogger.

Ayon kay Boss Dada, ang paulit-ulit na pagkukulang ng gobyerno sa mabilis at epektibong pagtugon sa mga biktima ng sakuna ay malinaw na palatandaan ng matagal nang problema ng katiwalian. Idinagdag pa niya na ang mga natural na kalamidad ay nagiging litmus test ng pamahalaan—kung saan nakikita kung gaano kahanda, gaano kaorganisado, at gaano katapat ang mga opisyal sa pagtupad ng kanilang tungkulin.

Bagama’t hindi tuwirang pinangalanan kung sino ang kanyang pinatutungkulan, maraming tagasubaybay ang nagkomento na malinaw ang mensahe laban sa mga nasa mataas na posisyon ng pamahalaan. Agad ding umani ng iba’t ibang reaksyon sa social media ang kanyang pahayag—may mga sumang-ayon at nagsabing dapat nang managot ang mga tiwaling opisyal, habang ang iba naman ay nagsabing “politicized” umano ang naturang banat.

Kilala si Boss Dada sa pagiging matapang at diretsong bumabatikos sa mga isyu ng pamahalaan. Dahil dito, patuloy na dumarami ang kanyang tagasubaybay at lumalakas ang impluwensya ng kanyang mga opinyon sa mga diskursong pampulitika sa bansa. (Larawan: Boss Dada TV / Facebook)