OKTUBRE 5, 2025 — Isinusulong sa Kamara ang panukalang batas na magbibigay ng sahod, proteksyon, at makataong kondisyon sa mga estudyanteng sumasailalim sa internship.

Inihain nina Akbayan party-list Rep. Chel Diokno, Perci Cendaña, Dadah Kiram Ismula, at Dinagat Islands Rep. Kaka Bag-ao ang House Bill No. 5081 o “Interns’ Rights and Welfare Act.” Layunin nitong wakasan ang matagal nang kalakaran ng libreng trabaho ng mga intern sa gobyerno at pribadong sektor.

Sa ilalim ng panukala, obligadong bigyan ng allowance ang mga intern: 75% ng Salary Grade 1, Step 1 para sa mga nasa ahensya ng gobyerno, at 75% ng minimum wage para sa mga nasa pribadong kumpanya.

Bukod sa sahod, itinatakda rin ng panukala ang pagbuo ng internship plan at memorandum of agreement sa pagitan ng paaralan at employer. Dapat malinaw ang layunin ng programa, at hindi lalampas sa regular na oras ng trabaho. May karampatang pahinga at limitasyon sa overtime.

Magkakaroon ng Task Force na binubuo ng CHED, DOLE, Civil Service Commission, at mga kinatawan ng estudyante upang bantayan ang pagpapatupad, tumanggap ng reklamo, at magpataw ng parusa sa mga lalabag.

Ayon kay Diokno, “For these programs to truly serve their purpose, we must also protect the rights and welfare of our interns, and ensure that they are treated with respect and dignity.” 

(Para tunay na magampanan ng mga internship program ang layunin nito, dapat tiyakin ang karapatan at kapakanan ng mga intern, at ituring silang may dignidad.)

Dagdag pa niya, “No student should have to choose between learning and being taken advantage of — our legislative duty is to guarantee both quality education and fair treatment.” 

(Walang estudyanteng dapat pumili sa pagitan ng pagkatuto at pagsasamantala — tungkulin ng batas na tiyaking may kalidad ang edukasyon at patas ang trato.)

Kaugnay nito, naghain din si Sen. Risa Hontiveros ng katulad na panukala sa Senado. Nauna na niyang isinampa ang bersyon nito noong 2019, ngunit hindi ito umusad sa komite.

Sa kasalukuyan, walang batas na nag-uutos ng sahod para sa mga intern. Ang CHED Memorandum Order No. 104 s. 2017 ay nagtakda lamang ng limang buwang internship, at hindi obligadong magbigay ng bayad ang mga kumpanya.

(Larawan: Chel Diokno | Facebook)