OKTUBRE 5, 2025 — Nagpakita ng mas matinding aktibidad ang Bulkang Kanlaon nitong Sabado, ayon sa pinakahuling ulat ng Philippine Institute of Volcanology and Seismology (Phivolcs).

Sa loob ng 24 oras, nakapagtala ang ahensya ng 65 na lindol sa paligid ng bulkan — malayo sa 11 na naitala noong nakaraang araw. Bukod dito, umabot sa 1,805 tonelada ang ibinugang sulfur dioxide, mas mataas kumpara sa 1,531 tonelada noong Biyernes.

Napansin din ng Phivolcs ang pagtaas ng usok mula sa bunganga ng bulkan na umabot sa 650 metro ang taas at tinangay ng hangin patungong kanluran-hilagang-kanluran.

Patuloy pa rin ang pag-umbok ng estruktura ng bulkan, indikasyon ng presyur sa ilalim ng lupa. Dahil dito, nananatili sa Alert Level 2 ang Kanlaon — hudyat ng patuloy na pag-aalburoto.

Binigyang-diin ng Phivolcs na bawal pa ring pumasok sa apat na kilometrong permanent danger zone sa paligid ng bulkan. Mahigpit ding ipinagbabawal ang paglipad ng anumang aircraft malapit sa lugar.

Nagpaalala ang ahensya sa mga residente sa Negros Occidental at Negros Oriental na maging alerto sa posibleng panganib gaya ng biglaang pagsabog ng singaw o phreatic eruption, pati na rin ang senyales ng pag-akyat ng magma.

“Sudden steam-driven or phreatic eruptions may occur without warning,” babala ng Phivolcs. 

(Maaaring maganap ang biglaang pagsabog ng singaw nang walang babala.)

Pinayuhan ang mga lokal na pamahalaan na ipatupad ang mga hakbang pangkaligtasan at bantayan ang mga komunidad sa paligid ng bulkan. Patuloy ang pagmamatyag ng Phivolcs sa galaw ng Kanlaon at inaasahang maglalabas ng karagdagang abiso kung kinakailangan.

Sa gitna ng tumitinding aktibidad, nananatiling mahalaga ang pag-iingat at pakikinig sa mga opisyal na abiso upang maiwasan ang sakuna.

(Larawan: Philippine Institute of Volcanology and Seismology (PHIVOLCS-DOST) | Facebook)