OKTUBRE 6, 2025 — Nag-ugat ang tensyon sa pagitan ng Malacañang at Baguio City Mayor Benjamin Magalong matapos ang kanyang pagbibitiw sa Independent Commission for Infrastructure (ICI), isang hakbang na sinundan ng mga patutsada at tanong mula sa Palasyo.

Sa isang panayam, tinanong ni Presidential Communications Undersecretary Claire Castro kung sino ang tinamaan sa mga pahayag ni Magalong. 

“Whose nerve?” ani Castro, kasunod ng sinabi ni Magalong na, “I think I struck a nerve.” 

Hinamon ni Castro si Magalong na magpangalan ng mga taong tinutukoy niya sa halip na magparinig. Giit niya, hindi si Pangulong Ferdinand Marcos Jr. ang nag-utos ng pagbibitiw ni Magalong. Aniya, ang dating pahayag niya ay batay lamang sa sinabi ng Pangulo na kailangang suriin kung ang sabayang pag-upo ni Magalong bilang alkalde at tagapayo ng ICI ay hindi lumalabag sa Konstitusyon.

Kinumpirma ni Castro na inalok si Magalong ng posisyon bilang miyembro ng komisyon, ngunit tumanggi ito dahil ayaw niyang iwan ang pagka-alkalde ng Baguio.

Nauna nang kinuwestiyon ni Magalong ang press briefing ni Castro na umano’y nagpapalabo sa kanyang papel sa ICI.

Samantala, itinanggi ni Castro na ang ICI ay kalabisan sa mga tungkulin ng Department of Justice (DOJ) at Ombudsman. 

“Based on EO 94, (the ICI’s mandate) is recommendatory. They will gather the documents, and they can recommend the filing of a case to the ombudsman or the DOJ,” paliwanag niya. 

(Batay sa EO 94, recommendatory ang mandato ng ICI. Sila ang mangangalap ng dokumento at maaaring magrekomenda ng pagsasampa ng kaso sa Ombudsman o DOJ.)

Dagdag pa niya, mas magiging magaan ang trabaho ng DOJ at Ombudsman kung kumpleto na ang dokumento mula sa ICI.

Sa gitna ng panawagan ng ilang mambabatas na gawing institusyonal ang ICI sa pamamagitan ng batas, binigyang-diin ni Castro na bagama’t nilikha ito sa pamamagitan ng Executive Order, hindi ito kontrolado ng Pangulo.

“It will be up to the ICI to determine its policies since it is independent from the executive. The President will not interfere,” ani Castro. 

(ICI ang magtatakda ng mga patakaran nito dahil ito’y hiwalay sa ehekutibo. Hindi makikialam ang Pangulo.)

(Larawan: Presidential Communications Office)