OKTUBRE 19, 2025 — Arestado ang pitong lalaking South Korean matapos maaktuhang nagpapatakbo ng ilegal na online sugal sa loob ng isang condominium unit sa Clark Freeport Zone, Pampanga noong Oktubre 13.

Ayon sa Bureau of Immigration (BI), ang operasyon ay bahagi ng pagtugis sa isang South Korean fugitive na umano’y nagtatago sa lugar. Ngunit sa halip na maabutan ang target, nadiskubre ng Fugitive Search Unit (FSU) ng ahensya ang pitong banyaga na abala sa mga workstation na konektado sa online betting platform.

“Instead, the team encountered seven male Koreans who were caught in the act of manning workstations suspected to be connected to online gambling activities,” pahayag ng BI. 

(Sa halip, nadatnan ng team ang pitong lalaking Koreano na aktibong gumagamit ng mga workstation na hinihinalang konektado sa online gambling.)

Batay sa imbestigasyon, ang mga dayuhang suspek ay sangkot sa maliitang operasyon ng sugal gamit ang isang platform na tumataya sa iba’t ibang sporting events sa buong mundo.

Isa sa mga naaresto ay kinilalang si Ha Dong Jun, 23, na matagal nang pinaghahanap ng BI mula pa noong Enero 2025 dahil sa kabiguang umalis ng bansa matapos ipatigil ang operasyon ng mga Philippine Offshore Gaming Operators (POGO).

Matatandaang ipinag-utos ni Pangulong Ferdinand Marcos Jr. ang tuluyang pagbabawal sa POGO noong Hulyo 2024. Simula noon, agresibong ipinatupad ng BI ang deportasyon ng mga dayuhang sangkot sa naturang industriya.

“We will not allow foreign nationals to continue online gaming activities in the Philippines,” ayon kay BI Commissioner Joel Anthony M. Viado. 

(Hindi namin pahihintulutan ang mga dayuhang magpatuloy sa online gaming activities sa Pilipinas.)

Babala pa ni Viado, ang sinumang dayuhang magpupumilit sa ganitong gawain ay tiyak na huhulihin at ipapa-deport.

Sa ngayon, nakakulong ang mga suspek habang inaayos ang kanilang deportasyon.

(Larawan: Philippine News Agency)