OKTUBRE 19, 2025 — Isang 23-anyos na vlogger ang natagpuang patay matapos tangayin ng malakas na agos ng tubig habang tumatawid sa sapa sa Sitio Bagaas, Barangay Malocloc Sur, Ivisan, Capiz nitong Sabado, Oktubre 18.

Kinilala ang biktima na si Mae Urdelas, empleyado rin sa kantina ng paaralan. Pauwi na umano siya kasama ang kapatid at bayaw nang maganap ang insidente bandang alas-5 ng hapon. Ayon kay Barangay Captain Allan delos Santos, nadulas si Urdelas sa batuhan at tuluyang inanod ng rumaragasang tubig.

“Tumawid sila sa sapa, pero nadulas siya. Hindi na siya nakita agad dahil malakas ang agos,” ayon kay delos Santos. 

Agad nagsagawa ng search operation ang mga residente at opisyal ng barangay. Makalipas ang halos tatlong oras, natagpuan ang katawan ni Urdelas isang kilometro ang layo mula sa lugar kung saan siya nahulog.

Bago pa man ang trahedya, nag-post si Urdelas sa kanyang vlog ng mensaheng “Tama nana nga ulan,” na tila pagod na sa walang tigil na pag-ulan.

(Sapat na ang ulan.)

Ang insidente ay kasabay ng pananalasa ng Bagyong Ramil na nagdulot ng matinding pagbaha sa Capiz at iba pang bahagi ng Western Visayas. Ayon sa PAGASA, unang tumama ang bagyo sa Gubat, Sorsogon bandang alas-4:10 ng hapon, na dahilan ng walang patid na ulan sa rehiyon.

Nagpaalala ang mga awtoridad sa publiko na huwag tumawid sa mga ilog at sapa tuwing may malakas na ulan. Pinayuhan din ang mga residente na maging alerto sa banta ng biglaang pagbaha habang patuloy ang epekto ng bagyo.

(Larawan: Wikimedia Commons)