Patuloy na pinatutunayan ng mga Pilipino ang pagiging aktibo sa digital na mundo matapos lumabas sa mga ulat na kabilang ang Pilipinas sa mga bansang may pinakamataas na bilang ng gumagamit ng ChatGPT sa buong mundo.

Ayon sa Digital 2026 report na inilabas ng Meltwater at We Are Social, 42.4% ng mga internet user sa Pilipinas ang gumamit ng ChatGPT sa nakaraang buwan, mas mataas kaysa sa global average na 26.5%. 

Sa naturang ulat, pumuwesto ang Pilipinas sa ika-anim na ranggo sa global usage, kasunod ng Kenya (49.5%), Brazil (49.1%), Israel (49%), Malaysia (48.4%), at United Arab Emirates (44.7%).

Bukod pa rito, isang hiwalay na ulat mula sa Cebu Daily News ang nagsabing ang Pilipinas ay nasa top five sa global traffic ng ChatGPT, na may 3.30% ng kabuuang paggamit sa buong mundo noong Setyembre 2024. Nangunguna ang Estados Unidos (14.18%), sinundan ng India (10.62%), Brazil (5.21%), at Indonesia (4.12%).

“ChatGPT is quickly turning into a go-to digital companion for Filipinos,” ayon sa ulat ng Meltwater, na nagpapakita kung paanong ginagamit ng mga Pilipino ang AI sa kanilang araw-araw na buhay—mula sa pag-aaral, trabaho, negosyo, hanggang sa personal na komunikasyon.

Mula nang ilunsad noong huling bahagi ng 2022, ang ChatGPT ay naging pinakamabilis na lumaking consumer software application sa kasaysayan. Gamit ang large language model, nakagagawa ito ng teksto at imahe batay sa mga prompt ng user.

Ayon sa World Bank, ang mga gumagamit sa mga developing countries tulad ng Pilipinas ay masigasig na tinatangkilik ang generative AI tools gaya ng ChatGPT upang mapadali ang kanilang trabaho at pamumuhay.

Sa kabila ng mga hamon sa digital infrastructure, nananatiling masigasig ang mga Pilipino sa pagyakap sa makabagong teknolohiya, patunay ng kanilang pagiging adaptive at tech-savvy sa modernong panahon.