LOS BAÑOS, LAGUNA — Niyanig ng isang mababang lindol na may lakas na Magnitude 2.0 ang bayan ng Los Baños, Laguna ngayong Oktubre 28, ganap na alas-11:31 ng umaga, ayon sa ulat ng Philippine Institute of Volcanology and Seismology (PHIVOLCS).

Batay sa ulat, naramdaman ang bahagyang pagyanig sa ilang bahagi ng bayan, partikular sa University of the Philippines Los Baños (UPLB) at mga kalapit na lugar. Bilang pag-iingat, agad na inatasan ang mga estudyante at kawani ng unibersidad na lumabas ng mga gusali upang matiyak ang kanilang kaligtasan.

Ayon sa PHIVOLCS, ang sentro ng lindol ay natukoy sa mababaw na bahagi ng lupa sa paligid ng Los Baños at hindi inaasahang magdudulot ng pinsala o aftershocks. Gayunman, pinaalalahanan ng ahensya ang publiko na manatiling alerto at sumunod sa mga patakaran ng pamahalaan ukol sa kaligtasan sa panahon ng lindol.

Sa kabila ng pagyanig, walang naiulat na nasugatan o napinsalang estruktura sa lugar. Patuloy namang minomonitor ng mga awtoridad ang sitwasyon upang matiyak ang kaligtasan ng mga residente. (Larawan: UPLB Perspective / Facebook)