LILOAN, CEBU — Isa sa mga pinakamasaklap na kwento ng trahedya sa pananalasa ni Bagyong Tino ay ang sinapit ni Krizza Espra, isang ginang mula sa Barangay Cotcot, Liloan, na nawalan ng asawa at tatlong anak sa gitna ng matinding pagbaha noong Nobyembre 4.

Ayon sa ulat ng GMA News, si Espra ay nawalan ng mister at mga anak na edad 1, 3, at 8 taong gulang, matapos bumigay ang isang gusali sa tabi ng kanilang bahay habang sila ay nasa bubong upang magligtas ng sarili. 

“Hindi maipaliwanag. Nagising kami sa paa lang ang baha. Ilang minuto umabot siya dito [sa dibdib],” ayon kay Espra.

Bukod sa kanyang asawa at mga anak, namatay rin ang kanyang ama at pamangkin sa parehong insidente. Sa kasalukuyan, si Espra ay nasa isang funeral parlor, kasama ang iba pang biktima ng baha, habang patuloy ang paghahanap sa kanyang ina na nawawala pa rin.

Ang Barangay Cotcot ay isa sa mga pinakamalubhang tinamaan ng pagbaha sa Cebu, dulot ng pag-apaw ng Cotcot River. Ayon sa lokal na pamahalaan, tinatayang 48 katao ang nasawi sa buong lalawigan, habang 29 pa ang nawawala.

Patuloy ang search and rescue operations sa Liloan at mga kalapit na bayan, habang nananawagan ang mga residente ng karagdagang tulong mula sa national government, lalo na sa pagkain, tubig, at temporary shelter.

Ang trahedya sa Liloan ay nagsilbing paalala sa kahalagahan ng maagang babala, matibay na imprastruktura, at mas epektibong disaster preparedness sa mga lugar na madalas tamaan ng kalamidad.

Larawan mula GMA News