NOBYEMBRE 7, 2025 — Maaari nang mag-apply online ang mga miyembro ng Social Security System (SSS) para sa calamity loan na hanggang ₱20,000, bilang tugon sa pinsalang iniwan ng Bagyong Tino. Epektibo ang aplikasyon simula Nobyembre 6 at tatagal hanggang Disyembre 5.

Ayon sa SSS, ang loan ay may taunang interes na 7% at maaaring bayaran sa loob ng dalawang taon. Direktang ilalagay ang pera sa bank account na naka-enroll sa My.SSS.

Para makakuha ng loan, kailangang:

• Nakatira o nagtatrabaho sa lugar na idineklarang nasa ilalim ng state of calamity
• May hindi bababa sa 36 na hulog sa SSS
• May aktibong My.SSS account
• Walang overdue o restructured loan
• Edad 18 hanggang 64
• Walang record ng panlilinlang sa ahensya

Sa pahayag ni SSS President at CEO Robert Joseph Montes de Claro, sinabi niyang: “We want to provide immediate financial relief to our members affected by Typhoon Tino.” 

(Nais naming magbigay ng agarang tulong pinansyal sa mga miyembrong naapektuhan ng Bagyong Tino.)

Ang aplikasyon ay isinasagawa sa My.SSS portal. Piliin ang “Loans” sa menu, tapos “Calamity Loan,” at itakda ang “CLP - TC TINO” bilang loan type. Maaaring pumili ng halaga at bangko para sa disbursement.

Bukod sa Tino, may hiwalay na loan program para sa mga apektado ng Bagyong Ramil sa Roxas City at Sigma, Capiz. Hanggang Disyembre 4 ang deadline ng aplikasyon para sa mga lugar na ito.

Batay sa ulat ng National Disaster Risk Reduction and Management Council, tinamaan ng Tino ang 2.1 milyong katao sa 32 probinsya. Mahigit 432,000 ang lumikas, 81 ang nasawi, 72 ang nawawala, at 81 ang nasugatan. Tinatayang ₱6.33 milyon ang pinsala sa imprastraktura.

Dahil sa lawak ng epekto, idineklara ni Pangulong Ferdinand Marcos Jr. ang state of calamity sa buong bansa upang mapabilis ang pag-access sa pondo para sa rehabilitasyon.

(Larawan: Yahoo News UK)